Madam,

Dangosodd adroddiad tasglu y Dr Elin Jones (Y Cwricwlwm Cymreig, hanes a stori Cymru, Medi 2013) bod y sylw a roddir i hanes Cymru yn gwbwl annigonol, neu’n wir yn prin ddigwydd, mewn llawer iawn o ysgolion. Gwnaed nifer o argymhellion pwysig, gan gynnwys datgan y “dylai’r fersiwn nesaf o’r cwricwlwm cenedlaethol i Gymru gymryd fel man cychwyn syniadau’r Cwricwlwm Cymreig presennol” ac na ddylid mwyach “gyfeirio at ‘gwricwlwm cenedlaethol’ a ‘Chwricwlwm Cymreig’ ond at ‘gwricwlwm Cymru’ yn unig”.

Wrth gyhoeddi y byddai’r Athro Donaldson yn arwain adolygiad o addysg yng Nghymru ym Mawrth 2014, dywedodd y Gweinidog Addysg ar y pryd, Huw Lewis, ei fod “am weld cwricwlwm unigryw yn cael ei ddat-blygu i Gymru”. Nid yw adroddiad Donaldson, Dyfodol Llwyddiannus, yn cynnig unrhyw arweinad clir ar sut y gweithredir y dyheadau hyn.

O ganlyniad, mae pryder gwirioneddol na fydd y cwricwlwm newydd yn adlewyrchu nodweddion neilltuol Cymru ac, o ran hanes, y bydd ysgolion yn parhau i anwybyddu hanes Cymru.

Ni ellir caniatau i sefyllfa o’r fath barhau, felly ymunwch â ni i leisio eich barn ac i gyfrannu i’r broses o ddatblygu polisïau amgen trwy fynychu’r gynhadledd ‘Dysgu Hanes i’n Plant. Pa Hanes?’ a gynhelir yng Nghanolfan Hanes Uwchgwyrfai, Clynnog Fawr ddydd Sadwrn 26ain o Dachwedd am 1 o’r gloch. Y siaradwyr yw Dr Elin Jones, Ystrad Mynach ac Eryl Owain, Penmachno a llywyddir gan John Dilwyn Williams, Pen-y-groes.

Cofrestrwch ar gyfer y gynhadledd bwysig hon trwy gysylltu â [email protected]

Yn gywir,

Dawi Griffiths, Cadeirydd y Ganolfan Hanes; Jina Gwyrfai, Cyd-drefnydd y Gynhadledd.