THE latest community news from Penrhyndeudraeth

Merched y Wawr

EFO’R dyddiau’n nosi yn gynharach, y dail yn disgyn a’r tywydd yn oeri mi roedd ‘na hen edrych ymlaen at ymuno unwaith eto yng nghyfarfod mis Hydref o Ferched y Wawr.

Ymhob cyfarfod mae’n angenrheidiol i wneud ychydig o waith papur ag i anfon ein cofion at yr aelodau sy’n sâl.

Yna, heb oedi aeth Catherine Jones, ein llywydd, ati i drafod trefniadau’r cyfarfodydd nesa.

Ar gyfer aelodau sy’n hoffi cystadlu mae ‘na Gwis Cenedlaethol, Bowlio Deg yng Nglanllyn i aelodau heini a chystadleuaeth Dominos a rhain i gyd yn y misoedd i ddod.

Os mai gwaith llaw yw eich diddordeb, cynhelir Cwrs Crefft yn Llanrwst ym mis Ionawr.

Digon at ddant pawb.

Haf Llywelyn, y bardd a’r awdures enwog oedd ein gwestai y tro yma.

Ganwyd a magwyd Haf yng Nghwm Nantcol, gan dderbyn ei haddysg yn Ysgol Gynradd Llanbedr ac Ysgol Ardudwy.

Gydag arddull hollol hamddenol a chartrefol cawsom bigion o’i hoff farddoniaeth a disgrifiad o gefndir rhai o’r llyfrau mae hi wedi cyhoeddi.

‘Mab y Cychwr’ llyfr sydd wedi ei leoli yn ardal Dolgellau.

Y ‘Traeth’ - y llyfr yma wedi ei leoli yn nes atom yn Llanfrothen.

Gwelwn yn y llyfrau yma ei brwdfrydedd yn ymchwilio i hanes lleol, ond yn ‘Stwffia dy ffon Hoci’ ceir awgrym cryf nad gemau oedd ei hoff bwnc ysgol!

Yn 2013 enillodd wobr y Cyngor Llyfrau, Tir na n-Og am ei llyfr ‘Diffodd y Sêr’ yn dweud hanes Hedd Wyn o Drawsfynydd.

Heb unrhyw amheuaeth noson wych arall yn hanes y gangen.

Mae’r gangen yn ddiolchgar i Lenyddiaeth Cymru am noddi’r noson.

Mis nesa mae gennym noson hollol wahanol i chi, sef - ‘Noson blasu Cynnyrch Blasus Aerona’.

Cyfle efallai i brynu anrheg Nadolig gwahanol.

Nos Lun, 27 Tachwedd, am 7yh yn y Neuadd Goffa.

If you’re a member of a club, society or group, send your news to [email protected]