THE latest community news from Talgarreg

Capel y Fadfa

BYDD yr oedfa ddydd Sul am 1.30yp gyda’r Parch Eirian Wyn Lewis, Mynachlog-ddu yn arwain mewn Oedfa Ddiolchgarwch. Croeso cynnes i bawb i’r oedfa arbennig hon.

Ddydd Sul diwethaf cynhaliwyd Cyrddau Blynyddol Cymdeithas Undodaidd ardal y Smotyn Du yng Nghapel Caeronnen am 1.30yp.

Braf oedd gweld cymaint wedi dod o’r gwahanol gapeli i’r oedfa a oedd yng ngofal y Parch Cen Llwyd. Wrth yr organ oedd Eirian Jones

Y gwr gwadd oedd Ben Lake. Cyfle iddo rannu ei brofiadau o’r misoedd cyntaf yn ei swydd fel Aelod Seneddol Ceredigion, ei weledigaeth a’i fwriadau a chafwyd cyfle i’w holi hefyd. Roedd yn agoriad llygaid i glywed am y profiadau amrywiol mae wedi eu cael hyd yn hyn. Dymunir yn dda iddo yn ei waith.

Roedd Carys Mai wedi dod gyda Ben; hi sy’n cadw trefn ar ei swyddfa yng Ngheredigion a dymunir bob lwc iddi hefyd yn ei swydd newydd.

At hyn roedd Glan Davies yn bresennol ar ran yr elusen Calonnau Cymru i dderbyn siec o £1,250, sef yr arian a godwyd adeg y daith gerdded a gynhaliwyd ym mis Gorffennaf.

I ddilyn cafwyd paned o de a chacennau a oedd wedi eu paratoi gan Mair a Meinir Green. Aed ymlaen wedyn i gynnal pwyllgor blynyddol o’r gymdeithas, gyda Nans Davies yn llywyddu.

Canu Gwlad

NOS Sadwrn diwethaf y canwr a’r digrifwr Clive Edwards oedd yn diddanu yng Ngwesty Glanyrafon ar wahoddiad Hefin a Megan.

Mae elw’r nosweithiau canu hyn i gyd, sy’n cael eu cynnal yn y gwesty, yn mynd tuag at Ymchwil Cancr, felly diolchir i bawb sy’n dod i gefnogi.

Sioe Hen Beiriannau

ER gwaethaf y tywydd cynhaliwyd Sioe Hen Beiriannau gweithiol a chynnyrch o bob math ar gae Coed Fardre, Bwlchyfadfa, trwy garedigrwydd Iwan Evans, ddydd Sadwrn diwethaf.

Thema’r dydd oedd certi a hen whilberi. Roedd rhywbeth at ddant pawb yng nghystadlaethau’r dydd, gan gynnwys lluniaeth a bar. Roedd yno hefyd arddangosfa o hen geir a pheiriannau.

Cymanfa Fodern

ROEDD Adran y Pentre’ wedi trefnu Cymanfa Ganu Fodern yn Eglwys Dewi Sant nos Sul am 7.30yh.

Yr arweinydd oedd Elin Dafydd a’r artistiaid oedd aelodau a chyn-aelodau Adran Talgarreg, CFfI Pontsian a CFfI Caerwedros.

Y llywydd oedd Ffion Hughes (Bodwenog gynt). Roedd holl elw’r noson yn mynd tuag at Uned Cemotherapi, Ysbyty Bronglais, Aberystwyth. Diolchir i bawb a ddaeth i gefnogi.

Bore Coffi

CYNHALIWYD Bore Coffi yn y Neuadd Goffa fore Gwener ddiwethaf, rhwng 10yb-12yp, gydag amrywiol stondinau a chacennau.

Roedd holl elw’r bore yn mynd tuag at Ofal Cancr Macmillan.

Diolchir i bawb am y gefnogaeth i’r digwyddiad boreol hyn, pryd y llwyddwyd i godi swm sylweddol o arian.

Capel Pisgah

CYNHELIR oedfa ddiolchgarwch Capel Pisgah ar nos Wener, 13 Hydref am 7yh.

Y pregethwr gwadd fydd y Parch Guto Llywelyn. Croeso cynnes i bawb.

If you’re a member of a club, society or group, send your news to [email protected]