THE latest community news from Llanfarian

Merched y Wawr

MAS i’r awyr iach fuodd y Merched yn eu cwrdd olaf ym mis Mai.

Dechreuwyd taith gerdded fer o orsaf yr heddlu gydag Anne yn awyddus i’n cyflwyno i fyd natur.

Wrth lwybro’n hamddenol ger glan afon Rheidol fe’n synnwyd gymaint o ryfeddodau oedd o’n cwmpas ar bob tu.

Roedd ‘na rywbeth neu’i gilydd i dynnu ein sylw boed yn flodyn, coeden, gwybedyn neu yn n?r yr afon.

Anelwyd at Lety Parc ac yno o gwmpas y bwrdd swper cafwyd cyfle i estyn gair o werthfawrogiad i Anne am drefnu ein taith gerdded ac yn bennaf am rannu o’i gwybodaeth fanwl am fyd natur.

Pan ddaw mis Mai daw taith Anne a “Gwyn fy myd bob tro y dêl”.

Cofiwyd am aelodau oedd yn absennol, a’n dymuniadau cynhesaf at Nesta a Joyce, ill dwy mewn ysbyty ar hyn o bryd.

Ond nawr edrychwn ymlaen yn hyderus at gydgerdded i’r dyfodol a chyd-gwrdd yn yr hydref o dan arweiniad tîm newydd.

If you’re a member of a club, society or group, send your news to [email protected]