THE latest community news from Talgarreg

Capel y Fadfa

CYNHALIWYD Cwrdd Pawb Ynghyd ddydd Sul diwethaf dan arweinyddiaeth y Parch Wyn Thomas. Cafwyd neges amserol a phwrpasol, hefyd diolchwyd i bawb fu’n tacluso o gwmpas y capel a’r fynwent yn ddiweddar. Wrth yr organ oedd Enfys Llwyd.

Hyfforddiant GDPR

DDYDD Sadwrn cynhelir sesiwn o hyfforddiant yn Festri Capel y Fadfa i swyddogion capeli ardal y Smotyn Du ynglyn â rheolau newydd ar ddiogelu data ac ar ofynion diogelu.

Bydd y sesiwn yn dechrau am 10yb a gobeithir gorffen tua 12.30yp.

Diwrnod agored

CYNHELIR Diwrnod Agored ddydd Sadwrn nesaf o 10yb – 6hy yn Amgueddfa Hen Bethau Ger y Nant i godi arian tuag at Ymchwil Cancr.

Ni fydd tâl mynediad, ond bydd raffl a derbynnir cyfraniadau.

Taith tractorau

DDYDD Sul diwethaf cynhaliwyd taith tractorau i godi arian tuag at Cylch Meithrin a Ti a Fi y pentref a Chymdeithas Alzheimer’s.

Braf oedd gweld dros 30 o dractorau yn teithio o gwmpas yr ardal, cyn dod yn ôl i ginio yn Nhafarn Glanyrafon. Diolchir i bawb am bob cefnogaeth a llwyddwyd i godi dros £950.

Rasys Trotian

CYNHALIWYD y rasys ar gaeau Rhydlydan ar Wyl y Banc. Cafwyd diwrnod llawn hwyl i’r teulu cyfan.

Capel Penrhiw

DDYDD Sul am 2yp bydd aelodau capeli’r Smotyn Du dan arweiniad Dylan Iorwerth yn gwneud cyflwyniad yn y capel yn Amgueddfa Sain Fagan i gofio 150 mlynedd ers etholiad 1868, pan ymladdodd yr Undodiaid yn ddewr yn erbyn gormes. Os yw aelodau Capel y Fadfa yn awyddus i fynd, ewch mewn cysylltiad â’r gweinidog, y Parch Wyn Thomas mor fuan â phosib i sicrhau eich lifft ar y dydd.

Gwyl y Pentref

ELENI cynhelir yr wyl ar nos Wener, 29 Mehefin, gyda helfa drysor ar droed a’r carnifal ar y dydd Sadwrn.

Llywyddion yr wyl fydd Mr a Mrs Jones, Fferm Rhydowen Fach a thema’r fflôt fydd Yr Ysgol.

Yn dilyn y carnifal a’r mabolgampau fydd Ras Sïon Cwilt a bydd rownderi a’r barbeciw yn dilyn y ras fawr.

Dewch yn llu am hwyl a sbri.

If you’re a member of a club, society or group, send your news to [email protected]