THE latest community news from Talgarreg

Capel y Fadfa

DDYDD Sul diwethaf cynhaliwyd Cwrdd y Gwanwyn, Cymdeithas Undodaidd ardal y Smotyn Du yng Nghapel Rhydygwin. Roedd y gwasanaeth yng nghofal y Parch Cen Llwyd.

Yn ystod yr oedfa cyflwynwyd siec o £700 tuag at waith elusen Alzheimer’s yn dilyn y bore coffi a gynhaliwyd yn ddiweddar yn Festri Capel y Fadfa.

Dilynwyd y cwrdd gyda chyfarfod busnes y gymdeithas, yna aeth pawb i’r Festri i ymuno mewn orig o gymdeithasu dros baned.

Ddydd Sul nesaf cynhelir yr oedfa am 10.30yb gyda’n gweinidog yn rhannu’r cymun. Croeso cynnes i aelodau a ffrindiau’r achos.

Caws a Gwin

NOS Wener ddiwethaf cafwyd caws, gwin a chlonc yn Nhafarn y Porth a braf oedd gweld cymaint wedi troi allan i gefnogi.

Dylan Iorwerth oedd yn cadw llygaid dros y panel o siaradwyr, sef Ben Lake AC, Canon Eileen Davies a Catrin Haf Jones.

Cafwyd pob math o gwestiynau ac atebion, gyda’r gynulleidfa yn mwynhau’r noson ddiddorol.

Noddwyr y noson oedd Gomer a threfnwyr y digwyddiad oedd Pwyllgor yr Ymofynnydd.

Roedd y penderfyniad wedi ei wneud os fyddai elw, byddai’n cael ei rannu rhwng elusennau MIND Cymru a Chanolfan Llys Pedr, Llanbedr Pont Steffan.

Braf yw cael cyhoeddi bod £400 wedi cael ei godi, felly bydd y ddwy elusen yma’n elwa o £200 yr un.

Cwis

AR nos Iau 18 Ebrill, cynhelir Cwis Pasg yn Nhafarn Glanyrafon am 7.30yh. Codir £5 y tîm, gyda hyd at 4 aelod ym mhob tîm. Bydd holl elw’r noson yn mynd tuag at Gymdeithas Henoed y Pentref a Chancr y Brostad.

Digon o amser o nawr tan y dyddiad i bawb gael timoedd yn barod am noson o hwyl a sbri.

Bydd y cwestiynau yn cael ei holi yn y Gymraeg a’r Saesneg, felly dewch i gefnogi ac i godi arian ar gyfer y ddwy elusen.

Ysgol Gynradd

DAETH llwyddiant i’r cefndryd Caio a Mali yn eisteddfod yr ysgol yn ddiweddar. Caio yn ennill tlws Saesneg a Mali yn ennill y prif lenor.

Hefyd bu rhai o blant yr ardal yn cystadlu yn Eisteddfod Ranbarthol yr Urdd ym Mhontrhydfendigaid yn ddiweddar a llongyfarchiadau i’r rhai sy’n mynd ymlaen i’r Eisteddfod Genedlaethol yng Nghaerdydd ddiwedd Mai.

If you’re a member of a club, society or group, send your news to [email protected]