Merched y Wawr

EIN gwr gwadd ar nos Fercher, 7 Hydref oedd Nigel Nicholas, Aberystwyth a’i destun oedd Yr Arfordir. Llywydd y noson oedd Aeronwen Edwards.

Trwy gyfrwng sleidiau, cafwyd awr hyfryd wrth ddilyn arfordir Ceredigion am tua 60 milltir a gorffen wrth eglwys fach hynafol y Mwnt. Gwelwyd golygfeydd prydferth iawn. Diolchwyd gan Olwen Jones.

Llongyfarchiadau i Sandra a’r ddathlu pen-blwydd arbennig ac i Aeronwen am ennill cwpan y coginio yn Sioe Llanfarian.

Bu rhai ohonom ar wahoddiad cangen Cylch Wyre, lawr yn neuadd Llanrhystud yn gwrando a’r aelodau Cardi-gân. Cafwyd noson hwyliog o ganu ardderchog. Diolchwyd am y bwyd hyfryd a’r cymdeithasu gan Anne Gwynne.

Aeth llawer ohonom ar drip Celf a Chrefft i Bortmeirion a swper yn y Llew Coch, Dinas Mawddwy i ddilyn.

Nos Fercher, 4 Tachwedd, daeth Nia Clement atom i ddangos gemwaith. Mae Nia’n byw yn Llangadog ac wedi addasu un o adeiladau’r fferm fel gweithdy.

Llywydd y noson oedd Aeronwen Edwards.

Roedd wedi dod â llawer o emwaith hyfryd a bu llawer o brynu arnynt - noson hyfryd.

Balch oeddem o gael aelodau canghennau Llwynpiod a’r Dderi atom. Cafwyd sawl raffl a bwffe hyfryd i orffen. Diolchwyd ar ran cangen y Dderi gan Deborah Jones, ar ran Llwynpiod gan Glenys Davies a changen Bronant gan Dorothy Lewis.

Roedd pawb yn falch o weld Eluned Jones, Hafodwen nôl gyda ni mor fuan wedi ei llawdriniaeth.

Tro nesaf, bydd ein Cinio Nadolig ar 2 Rhagfyr yn y Conrah, ger Aberystwyth.