Y penwythnos yma bydd chwe cystadleuydd ifanc yn camu ar lwyfan Canolfan y Celfyddydau yn Aberystwyth gyda’r nod o gipio Ysgoloriaeth yr Urdd Bryn Terfel, cystadleuaeth sydd dros y blynyddoedd wedi rhoi hwb i sawl gyfra disglair.

O Mirain Haf i Rhys Taylor, Rhian Lois i Rhydian Jenkins, mae Ysgoloriaeth yr Urdd Bryn Terfel, wedi bod yn lwyfan pwysig i rai o artistiaid mwyaf llwyddiannus Cymru.

Nos Sul bydd y gystadleuaeth yn dychwelyd am y tro cyntaf ers 2019 wrth i chwe thalent ifanc gystadlu am ysgoloriaeth o £4,000.

Dywedodd Siân Eirian, Cyfarwyddwr Eisteddfod yr Urdd a’r Celfyddydau: “Mae’r Urdd yn hynod o gyffrous i groesawu nôl Ysgoloriaeth yr Urdd Bryn Terfel a chael cynnig y profiad gwerthfawr yma i chwe cystadleuydd ifanc ar ddechrau eu gyfra.

"Mae’r cystadleuwyr i gyd wedi gweithio’n galed wrth baratoi, ac eisoes wedi elwa o’r profiad drwy gymryd rhan mewn gweithdai meistr gydag arbenigwyr profiadol o fewn eu maes.

“Hoffwn ddiolch i’r holl bobl sydd wedi cefnogi’r Urdd i gynnig y profiadau gorau posib i’r chwe cystadleuydd dros yr wythnosau diwethaf.

"Mae Ysgoloriaeth yr Urdd Bryn Terfel yn gyfle anhygoel i bob un sy’n cystadlu, ac yn blatfform arbennig i’r talentau ifanc hyn.

“Ar ran yr Urdd dymunaf y gorau i bawb sy’n cystadlu – yn bwysicach na dim, mwyhewch y profiad!”

Dewiswyd y cystadleuwyr gan banel o feirniaid yn seiliedig ar eu llwyddiant yn Eisteddfod yr Urdd Sir Ddinbych 2022.

"Y chwech fydd yn mynd ben ben am yr ysgoloriaeth yw; Fflur Davies (Cylch Arfon), Gwenno Morgan (Aelwyd Llundain), Ioan Williams (Adran Bro Taf), Mali Elwy (Adran Bro Aled), Owain Rowlands (Aelod Unigol Blaenau Tywi) a Rhydian Tiddy (Cylch Blaenau Tywi).

Fel rhan o’r paratoadau ar gyfer y gystadleuaeth, trefnodd yr Urdd ddosbarthiadau meistr unigol a phenodi mentor i’r chwe cystadleuydd.

Seren y West End Steffan Harri fu’n cynnal dosbarth meistr Fflur Davies, y pianydd talentog Iwan Llywelyn Jones fu’n helpu Gwenno Morgan, a’r dawnsiwr Osian Meilir fu’n cydweithio efo Ioan Williams.

Yr actor Ffion Dafis fu’n rhannu ei phrofiad â Mali Elwy, meistr y trombôn Dafydd Thomas fu’n helpu’r cerddor Rhydian Tiddy, a rhannodd Rhian Lois cyn-enillydd y gystadleuaeth yn 2008, ei chyngor hefo Owain Rowlands.

Yn ogystal, mae’r chwech wedi derbyn sesiynau ymarfer gyda Stifyn Parri a’r Gyfarwyddwraig Angharad Lee i baratoi ar gyfer y gystadleuaeth.

Wedi’r holl baratoi ac edrych ymlaen, mae’r noson fawr bron a chyrraedd.

Y panel beirniadu fydd Sioned Terry, Gwennan Gibbard, Barri Gwilliam, Bethan Williams–Jones a Huw Garmon.

Prin iawn yw’r tocynnau sydd ar ôl ar gyfer y digwyddiad; i fwynhau noson yn llawn adloniant a chyffro ewch i wefan yr Urdd neu Ganolfan y Celfyddydau, Aberystwyth i brynu eich tocyn.

Bydd rhaglen uchafbwyntiau Ysgoloriaeth yr Urdd Bryn Terfel yn cael ei ddarlledu Nos Sul, 12 Fawrth am 8yh ar S4C.